CPPO nakadawat og P1.6M insentibo

CEBU, Philippines - Mikabat sa P1.6 milyones nga cash incentives ang gihatag kagahapon sa Kapitolyo ngadto sa kapolisan sa probinsiya tungod sa ilang mga accomplishments sa kampaniya batok sa ginadiling drugas.

Ang vice chairman sa Cebu Provincial Anti-Drug Abuse Commission, Bokal Ivy Durano-Meca nagkanayon nga ang paghatag og insentibo gibase kun pila ka operasyon ang ilang napahigayon, pila ang nadakpan ug pila ka gramong shabu ang naembargo sa mga polis.

Ang probinsiya dunay budget nga gigahin alang sa programa batok sa ginadiling drugas lakip na niini ang simultaneous operations matag quarter sa tuig batok sa ginadiling drugas.

Mikabat sa 863.09 grams nga shabu ang nakompiska sa Provincial Intelligence Branch (PIB) sa ilang operasyon gikan sa buwan sa Enero hangtud sa Marso niinig tuiga.

Ang 34 ka personnel sa PIB nga nalambigit sa operasyon sa ginadiling drugas ang nakadawat sa maong pahalipay.

Ang lungsod sa San Francisco, Camotes Police Station mikabat sa 11.21 grams nga shabu ang ilang nakompiska ug nasikop nila ang mga nag-una sa watchlist.

Mikabat sa 12 ka personnel sa San Francisco, Camotes Police Station ang nakadawat og incentive.

Sa San Fernando Police Station pito ka personnel niini ang nakadawat og incentive tungod sa 168 gramos nga shabu nga ilang nakompiska.

Sa kinatibuk-an sa first quarter niining tuiga mikabat ngadto sa 1,042.03 gramos nga shabu ang nakompiska sa kapolisan sa  probinsiya.

Ang San Fernando Police Station pinangulohan sa ilang hepe nga si Chief Inspector Richard Gadingan nakadawat og P40,000 nga incentive ug P65,000 sa San Francisco, Camotes Police Station. (BANAT NEWS)