CEBU, Philippines - Gipusil sulod mismo sa drug den ang 36-anyos nga lalaki sa Villagonzalo II, Tejero, Dakbayan sa Sugbo kagahapon sa hapon.
Nagbuy-od nga patay na ang biktima nga si Alfred Domingo sulod sa panimalay nga gipanag-iya sa ginganlan og Wewe kinsa wala mopatim-aw atol sa imbestigasyon sa kapolisan.
Matud ni PO2 Dennis Gonzales, imbestigador sa Homicide Section sa Cebu City Police Office, nga nakuha nila tupad sa lawas sa biktima nga dunay samad sa iyang ulo ug tangkugo ang mga drug paraphernalia ug mga bala sa .9mm pistol.
Walay mga tawo nga andam moluwat og pamahayag may labot sa panghitabo.
Dugang sa kapolisan nga posibleng gisulod ang biktima sa drug den samtang nigamit sa ilegal nga drugas ug didto gipusil.
Pipila sa kabanay sa biktima nikonpirmar nga tiggamitan og drugas ang gipatay. (BANAT NEWS)