Top 1 drug pusher nitahan
CEBU, Philippines - Usa ka nangangkong drug pusher sa Dakbayan sa Mandaue mitahan sa kapolisan sa miaging Miyerkules sa gabii tungod nahadlok kang president-elect Rodrigo Duterte. Si Pablito Loberanes, 29, taga Sitio Dasco, Brgy. Paknaan boluntaryong nagpadakop sa mga polis sa alas 9:30 sa gabii, matud ni Police Senior Superintendent Jonathan Cabal, hepe sa Mandaue City Police Office.
Matud ni Cabal, tulo ka buwan nilang gipanid-an si Loberanes, kinsa maoy Top 1 nga drug personality sa siyudad.
"Malaki ‘yung hinahawakan niyang drugs, ‘yung nadi-dispose niya, yung area of operation niya is city-wide. Hindi lang sa Brgy. Pakna-an, meron din kumukuha sa kanya from other barangays," tataw ni Cabal sa Banat News. Si Loberanes, usa ka dispatser ug kanhi boksingero sa usa ka sikat nga kompanya, gikatahong miduol sa MCPO tungod nakabantay kini nga siya mao ang target sa mga polis ug mi-turn over sa iyahang AR-15 rifle nga iyang gibutang sa iyang multicab.
Lakip sab sa gi-surrender ni Loberanes, mao ang duha ka magazines ug 60 ka bala, upat ka gagmay’ng pakete sa shabu nga mikantidad og P10-mil hangtud P15-mil.
Nagkanayon si Cabal ang papa ni Loberanes nadakpan sab sa tuig 2005 sa kaso gihapon sa drugas ug naa karon sa Mandaue City Jail.
"Mas magmahay ‘ta ngano wala ‘ta mi-surrender. Kay sige man sila’g pangita nato. Nahadlok ko sa patakaran ba. Respeto lang. Wala tay dag-anan sa balaud gud. Dispatser ra gyud tawon (ko)," matud ni Loberanes. Matud niini dili siya ganahan nga iyahang anak nga maparehas kaniya. (BANAT NEWS)
- Latest
