CEBU, Philippines - Tulo ka mga langyaw ang gibalhog karon sa prisohan sa Carbon Police Station human kini giingong nagdala og mga menor de edad diha sa Cebu South Bus Terminal samtang mopadulong unta sa habagatan nga bahin sa probinsya sa Sugbo.
Ang tulo ka mga langyaw kansang mga nasyonalidad ug mga pangalan gitago samtang padayon pa ang imbestigasyon gisikop sa mga sakop sa Inter-Agency Council Against Trafficking.
Ang maong mga langyaw nagdala og tulo ka mga babaye ug sa dihang padulong na sila mosakay og bus sa CSBT giduol sila sa mga sakop sa IACAT.
Matud pa ni Chief Inspector Arieza Otida, pangulo sa Women’s Children Protection Desk sa Cebu City Police Office nga dili pa sila makabutyag sa identity sa maong mga langyaw kay padayon pa ang ilang gihimo nga imbestigasyon alang sa pagpasang-at og kaso.
Sumala pa ni Otida, usa sa mga babayeng kuyog sa maong langyaw menor de edad pa ug nagpuyo sa Cebu City. Ang grupo padung unta sa Kawasan Falls sa Badian.
Usa sa langyaw nga nahinabi sa Banat News nitug-an nga wala sila masayod nga minor de edad ang usa sa ilang mga kuyog tungod kay base sa pamahayag sa ilang kontak nga iyang higala 18 anyos na kini. (BANAT NEWS)