Mga eskuylahan andam na –DepEd

CEBU, Philippines - Matapos karong adlawa ang usa ka semana nga Brigada Eskwela nga gisugdan niadtong adlaw'ng Lunes sa tanang pampublikong mga tunghaan isip pagpangandam sa nagkaduol nga pagbukas sa klase karong Hunyo 13.

Nagtinabangay ang mga magtutudlo, ginikanan, nagkadaiyang sektor ug mga ahensya sa gobiyerno sa maong kalihokan sama sa paglimpyo, pagpamintal, pagpaayo sa mga linya sa kuryente ug tubig ug uban pa.

Giawhag usab sa DepEd ang mga organisasyon o mga indibidwal nga buot modonar nga kung mahimo dili kwarta ang ilang idonar kun dili mga materyales nga magamit sa tunghaan.

Giklaro usab sa DepEd nga dili tinuod ang mga taho nga dili dawaton ang tinun-an kun ang ginikanan niini wala makasalmot sa Brigada Eskwela.

Samtang gipahinumduman usab ang mga magtutudlo nga wala pa nakahatag sa mga report cards sa mga tinun-an nga kinahanglang ipanghatag na kini aron magamit sa mga tinun-an sa mas taas nga level sa pagtungha, kadtong magmagahi mahimong ireklamo.

“This is also a way of informing everybody that the Department of Education (DepEd) is ready to fully implement the K to12,” matud pa ni  Dr. Ardin Monisit, sa  Department of Education (DepED) Mandaue City Division.

Si Benjamin Tiongzon nga maoy  program supervisor sa DepEd Mandaue miingon nga gawas sa mga ginikanan lakip usab sa misalmot niini ang mga sakop sa  Bureau of Jail Management and Penology (BJMP), Yakult, Philippine National Police ug ang  Department of Social Welfare and Development.

“The spirit of volunteerism is seen in every people in the community most especially people living near the school,” ni Tiongzon pa sa iyang pamahayag  sa mga tigbalita. Decemay Padilla ug Romeo Limpangog (BANAT NEWS)