10 anyos gilugos

CEBU, Philippines - Nagpangagot ang ngipon ug dili masukod ang kalagot nga gibati sa usa ka amahan human kini nasayod nga nabiktima sa pagpanglugos ang iyang 10 anyos nga anak nga batang babaye ug ang suspek ang iyaha ra usab nga duha ka uyoan ug usa ka apohan.

Ang krimen nahitabo diha sa usa ka barangay ning Dakbayan sa Sugbo diin ang 10 anyos nga bata ang nagtungha isip grade 6 pupil.

Ang amahan kauban sa iyang asawa ug ang biktima nagpakitabang sa Mabolo Police Station aron mahatagan og hustisya ang gidangatan sa iyang anak.

Ang hepe sa Mabolo Police Station nga si Chief Insp. Wildemar Tiu nga nahinabi sa Banat News nagkanayon nga duha sa mga suspetsado ang usa ka uyoan ug ang apohan sa bata kasamtangang napriso sa Mandaue City Police gumikan sa kaso nga robbery.

Samtang ang lain niini nga uyoan nga nag edad og 20 anyos ang dali usab nga nakasibat.

Ang amahan nga nagtrabaho isip usa ka garbage collector sa barangay nga nahinabi sa Banat News nagkanayon nga iyang nasayran ang maong kremin niadto lang Sabado sa hapon.

Ang bata unang mitug-an sa nahitabo kaniya ngadto sa iyang iyaan nga siya gihilabtan sa iyang mga uyoan ug apohan kaniadto.

Sumala pa sa amahan nga niadto pa diay nag-edad pa og 7 anyos ang iyang anak gisugdan kini og binuang apan wala gyud kini mitug-an kay gihulga kini nga patyon.

Ang amahan nagduda nga nakadrugas ang mga suspetsado ug na-tripingan ang iyang anak.

Base sa gitug-an sa bata, katapusan kini nga nahilabtan niadtong Marso 14 sa alas 2 sa kaadlawon ug sa Mayo 8 alas-10 sa gabii, matud pa nga buhaton kini sa mga suspek kun wala iyang mga ginikanan. Ang usa sa mga suspetsado nga nakaikyas gikatahong usa ka bayot nga gituohang nagtago na karon sa probinsya sa Sugbo. (BANAT NEWS)