CEBU, Philippines - Gipaspasan na sa kagamhanan sa Siyudad sa Mandaue ang ilang proyekto may labot sa papuy-an sa mga biktima sa sunog sa Barangay Guizo ug Mantuyong kinsa temporaryong gipahiluna sa Cebu International Convention Center (CICC).
Kagahapon gitigum ang tanang stakeholders may labot sa reblocking, site development ug kondisyon sa mga biktima aron ma-finalize na ang implementasyon.
Matud ni Roger Paller, tigpamaba sa Mandaue City Hall, nga gusto ni Mayor Jonas Cortes nga dalion ang proyekto tungod kay gikabalak-an nila nga mosulod na unya ang La Niña.
Nalangay ug wala masunod ang target nga mabalhin ang mga biktima sa sunog sulod sa upat ka buwan gumikan sa mga kakulian sama sa pagbabag sa usa ka grupo sa reblocking. Unahon sa siyudad ang 6.5 meterwide nga road network sa dul-an duha ka ektaryang luna sa nasunugan.
Kahinumduman nga naghatag og financial assistance ang siyudad diin lakip niini ang waiver alang sa mga nag-abang nga kun makadawat og hinabang pinansiyal hatagan sila og 15 ka adlaw aron makakita og kabalhinan hinungdan nga kapin sa usa ka libo ang boluntaryong nibiya sa CICC.
Susamang gidaghanon na lang usab ang nagpabilin karon sa CICC.
Gibutyag ni Paller kapin sa P10 milyones ang gitagana nga pundo sa siyudad alang sa site development nga gikuha sa ilang disaster fund. (BANAT NEWS)