DOLE may tabang sa mga mag-uuma

CEBU, Philippines - Mokabat sa 2,430 ka mag-uuma sa Cebu, Bohol, Siquijor ug Negros Oriental nga apektado sa El Niño ang nakabenepisyo sa 10 ngadto sa 30 ka adlaw nga emergency employment sa Department of Labor and Employment program.

Ang DOLE nigahin og P19.7 milyones alang  sa Tulong Panghanapbuhay sa Ating Disadvantaged worker (TUPAD).

Matud ni DOLE-7 Director Exequiel Sarcauga nga 67 ka probinsya sa nasud ang apektado ang panginabuhian sa panguma tungod sa El Niño hinungdan nga nimando si DOLE Secretary Rosalinda Dimapilis- Baldoz nga hatagan og ayuda ang mga apektado nga mag-uuma.

 Ang gigahin dili lang alang sa suhulan sa mga trabahante apan lakip na usab sa group accident insurance ug personal protective equipment.

Matud ni Sarcauga nga nakig-alayon sila sa National Irrigation Administration aron pag-ila sa mga apektadong mag-uuma nga makadawat sa package services nga gidalit sa ilang buhatan.

Gitug-an ni Sarcauga nga sa Bohol, 1,036 ka mag-uuma ang nakaapil sa programa nga gikan sa Lungsod sa Ubay, Trinidad, San Miguel, Dagohoy, Pilar, Sierra Bullones, Alicia, Talibon, Carmen, Bilar, Talibon ug Loboc, samtang sa Dakbayan sa Sugbo mao ang Barangay Sinsin ug Cambinocot.

Lakip sa benepisyaryo ang pito ka lungsod ug duha ka dakbayan sa Sugbo nga naglangkub sa San Fernando, Carcar City, Asturias, Argao, Balamban, Tuburan, Toledo City, Sibonga ug Moalboal.

Si Sarcauga nipadayag nga may mga mag-uuma usab nga nakaapil gikan sa Negros Oriental sa Dauin, Zamboanguita, Siaton, Basay, Pamplona, Guihulngan, Bayawan, Canlaon ug Tanjay samtang Lungsod sa Maria ug Villanueva sa Siquijor. (BANAT NEWS)