Climate walk gikan sa Naga

CEBU, Philippines - Nagpahigayon kagahapon og climate walk ang nagkadaiyang environmental ug community groups gikan sa Dakbayan sa Naga hangtud sa Dakbayan sa Sugbo. Si Yeb Saño, executive director sa Greenpeace-Southeast Asia, nagkanayon nga ang tumong sa ilang kalihukan mao ang pagpaabot ngadto sa kagamhanan sa Dakbayan sa Sugbo nga dili aprobahan ang mga giduso nga coal-fired power plants.

Matud niya nga padayon sila nga mosuporta sa Barangay Sawang Calero nga giplanuhan unta nga tukuran sa duha ka 150MW coal-fired power plants sa Ludo Power Corp. Naglaum sila sa mga bag-ong konsehal nga motabang sa ilang mga pagpakigbisog batok sa coal-fired power plant.

Apan matud ni Saño nga dili sila mokompiyansa ug dili mohunong hangtud nga dili nila maseguro nga hingpit na nga ibasura ang proyekto lukop nasud.

Matud ni Saño nga adunay mga lugar gawas sa Sugbo nga ang mga proponents sa proyekto nipadayon gihapon sa pagduso bisan pa man og gisalikway na sa lokal nga kagamhanan.

Samtang si Jonathan Tumulak, operations chief sa Cebu City Transportation Office, nagkanayon nga ang maong climate walk nakamugna og paghinay sa dagan sa trapiko sa South Road Properties.

Matud ni Tumulak nga nataymingan nga naluya na ang mga naglakaw hinungdan nga nihinay nga gisundan sa mga sakyanan. Gani dunay pipila nga ilang gipasakay sa patrol car ug gihatud sa Cebu City Hall.

Si Tumulak nidugang nga iya una tan-awon kung adunay permit ang maong rally sanglit wala siya nahibawo niini. (BANAT NEWS)