Amoebiasis ang nakaingon

CEBU, Philippines – Dili mominos 20 na lang ka mga tawo ang pabiling giobserbahan sa Minglanilla District Hospital human sila nalanag sa buko fruit salad nga ilang gikaon sa gipamistahang balay sa Sitio Kapanang, Brgy. Naalad, Dakbayan sa Naga. Kini ang gibutyag ni Teresita Sayson ang chief nurse sa Minglanilla District Hospital nga nahinabi sa Banat News. Matud pa ni Sayson, ang pamilya nga nagpreparar sa maong pagkaon nagpabilin pa lakip ang pipila nila ka mga bisita.

Migawas sa eksaminasyon nga amoebiasis ang kagaw nga nakita sa ilang gikaon, makuha kini sa nakontamina nga pagkaon.

Si Dr. Andres Gestopa, ang pangulo sa City Health Department sa Dakbayan sa Naga, nagkanayon padayon nilang gi-monitor ang mga pasyente nga naa pa sa tambalanan. Subling gipahinumdoman ni Gestopa ang publiko nga sigurohon gyud ang kalimpyo samtang nagpreparar sa pagkaon. Samtang si Kapitan Sandra Cañalita sa Barangay Naalad nagpasalamat kang Mayor Valdemar Chiong sa tanang ayuda nga gihatag. -

/EIM) (BANAT NEWS)