CEBU, Philippines - Nibahad si Toledo City Mayor Sonny Osmeña nga mopasaka og reklamo batok nilang Commission on Elections-7 Director Jose Nick Mendros ug City Election Officer Michael Angelo Sarno.
Kini adunay kalambigitan sa pagsulod ni Sarno og tungang gabii sa iyang buhatan bisan gibalhin na siya sa Cebu City South District.
Matud ni Osmeña nga imbis ipaimbestigar ni Mendros, ang hepe na hinuon sa kapolisan sa siyudad nga si Supt. Samuel Mina ang gipapulihan ni Supt. Elmer Lim.
Sa press conference kagahapon, si Osmeña nagkanayon nga makigkita siya sa iyang abogado aron tun-an nila ang tukmang kaso nga ipasaka batok sa nahisgutang mga opisyal sa Comelec.
Sa laing bahin, ang kandidato sa pagka-konsehal sa Dakbayan sa Toledo nga si Ma. Risa Rafols nga kaalyado ni Osmeña niduso og election protest batok kang Arlene Espinosa Zambo, Ian Geronimo Zambo ug Louis Nicholas Espinosa, kandidato sa pagka-konsehal ubos sa One Cebu Party.
Si Rafols niawhag sa Comelec nga magpahigayon og recount sa resulta sa nilabay’ng eleksiyon tungod kay natahap siya nga adunay anomalosong nahitabo. (BANAT NEWS)