CEBU, Philippines - Magpadayon gihapon ang mga nag-unang serbisyo sa kagamhanan sa Dakbayan sa Sugbo bisan pa man og nasuspenso si Mayor Michael Rama ug uban pang 13 ka opisyal.
Sa gipahigayong The Freeman/Banat News Roundtable Talk kagahapon, kauban si acting mayor Margarita Osmeña, siya mipasalig nga dili ipahunong ang mga serbisyo sa dakbayan.
Magpadayon gihapon ang City Hospitalization and Medical Assistance Program (CHAMP) nga programa sa nasuspenso nga mayor.
Miklaro si Osmeña nga dili tinuod ang mga hungihong nga kini nahunong lakip na ang Burial Assistance.
“That is our responsibility. And I have to make it clear also that it does not follow the suspended mayor. In fact the head of the CHAMP was in my office yesterday,”pasabot ni Osmeña. Midugang usab si Osmeña nga nagpahigayon na og cash audit ang Commission on Audit ug Bureau of Local Government Finance aron makita ang estado sa panudlanan sa dakbayan. Sa miaging adlaw, gimandoan ni Osmeña si Mercy Santos kinsa director sa BLGF sa pag-audit sa tanang pundo sa opisina sa treasurer sa dakbayan.
Sa nasayran ni Osmeña aduna na lang nahibilin nga P7.6 bilyones nga pundo ubos sa General Fund.
Si Osmeña nipasabot nga kun wala mahalini ang siyudad og luna sa SRP sa miaging tuig nabangkarota na kini. Ang dakbayan nakahalin og P8.3 bilyones sa 45.2 ka ektarya nga luna sa SRP.
Miangkon si Osmeña nga wala siyay dako nga mahimo sulod sa unom ka semana nga siya mulingkod isip acting mayor apan mipasalig nga iyang buhaton ang kutob sa iyang mahimo bisan og kini ginagmay. (BANAT NEWS)