Mga opisyal sa Kapitolyo mga dato
CEBU, Philippines - Ang hepe sa Cebu Provincial Planning and Development Office (PPDO) maoy labing adunahan sa tanang department heads sa Kapitolyo base sa ilang Statement of Assets, Liabilities and Net worth (SALN). Si Benigno Christopher Lucero may kinatibuk-ang katigayonan nga kantidad og P12.2 milyones ug wala siya’y liabilities. Kaniadtong 2015, si Lucero mideklarar og P11.7 milyones nga assets.
Nagsunod kang Lucero ang Provincial Information Officer nga si Ethel Natera nga may net worth nga P6.1 milyones, ug dayon ang hepe sa Provincial Environment and Natural Resources (PENRO) nga si Chad Estella nga may P5.2 milyones nga assets.
Apan si Estella adunay P700 mil nga liabilities sama sa loan.
Ang hepe sa Provincial Health Office (PHO) nga si Dr. Cynthia Genosolango may assets usab nga P4.8 milyones.
Si Marie Jeanette Saluba, IT officer mideklarar usab og assets nga P3.8 milyones, samtang ang hepe sa Provincial General Services Office (PGSO) mideklarar og P3.7 milyones nga katigayonan og salapi.
Ang hepe sa Provincial Disaster Risk-Reduction Management Office (PDRRMO) nga si Baltazar Tribunalo mideklarar og assets nga P3.6 milyones, samtang si Carmen Quijano, Local Revenue Collection Officer IV, mitug-an nga ang iyang assets miabot og P3.9 milyones.
Si assistant provincial administrator Mark Tolentino mideklarar usab og P7 milyones, samtang si Provincial Assessor, Alma Sibonga mipahibalo nga ang iyang assets miabot og P4.5 milyones.
Nahibaw-an nga si Provincial Accountant Marieto Ypil may P3.6 milyones samtang ang hepe sa Provincial Social Welfare and Development Office (PSWDO) nga si Marivic Garces may P4.5 milyones nga assets. (BANAT NEWS)
- Latest
