CEBU, Philippines - Nikabat sa 187 ka kaso sa pagpangabuso sa kabataan ug kababayen-an ang naduso ngadto sa korte sa Provincial Women’s Commission sukad niadtong 2011 hangtud 2015 diin wala pay desisyon ang korte.
Sa maong mga kaso, 152 niini sa tuig 2011 ug 35 ka kaso sa tuig 2015 kinsa ang mga biktima gibutang sa shelter ug gipa-eskwela sa gobiyerno. Base sa report sa PWC nga lima ka foreigners ang nasikop ug napasakaan og kasong qualified trafficking ug pagpanglugos.
Niadtong Abril 2015, usa ka giingong pedophile ug trafficker nga German ang nasikop, usa ka Australian kinsa nalambigit sa pagpangabuso og babaye ang nasikop niadtong Mayo 2015, usa ka American ang giingong nimolestiya og menor de edad ang nasikop niadtong Hunyo 2015 ug duha ka magsuon ang nasikop sab niadtong Marso 20 tungod sa paglugos nila sa ilang silingan nga mabdos.
Ang PWC nakigtambayayong sa National Bureau of Investigation (NBI) ug Philippine National Police (PNP) sa ilang mga operasyon.
Ang mga personnel sa PWC gipaubos sa mga training ug seminars sa pagpauswag sa ilang mga nahibaw-an kabahin sa pagpahigayon og operasyon sa pagpaniid ug pagsikop sa mga suspetsado. (BANAT NEWS)