Mga pawikan nidagsa sa Oslob

CEBU, Philippines - Gitutukan karon sa kagamhanan ang pagtumaw sa mga pawikan sa kadagatan sa Tan-awan, Lungsod sa Oslob.

Matud ni Elizabeth Benologa, tourism officer sa lungsod, nga ang mga pawikan dili makit-an sa mabaw  nga lugar kung dili adto ra sa lawom.

Dugang ni Benologa nga iya pa ipadangat ngadto sa mayor, konseho ug sa marine biologist kung unsay buhaton sa maong mga pawikan.

Si Eddie Llamedo, tigpamaba sa Department of Environment and Natural Resources-7, nitug-an nga mopahigayon sila og hiniusang pakisusi sa Bureau of Fisheries and Aquatic Resources ug lokal nga kagamhanan sa Oslob.

Ilang pahimangno nga dili gyud pasipad-an ang mga pawikan.

Samtang naghimo pa og validation ang BFAR sa report sa danyos sa isdaan sa Sugbo nga epekto sa El Niño. Si BFAR-7 Director Andres Bojos nibutyag sa Banat News nga kinahanglan nila susihon pagbalik gumikan kay adunay mga inland fish farming nga wala magbuhi og semilya sa pagkadungog pa lang sa umaabot nga huwaw.

Gipasabot ni Bojos nga ang inland fish farming mao kadtong mga namuhi og tilapia ug bangus nga dili konektado sa dagat.

Matud niya nga adunay posibilidad nga gi-report sa fish farmers ang danyos bisan og wala gyud sila nagbuhi tungod sa kainit ug kini gitawag og loss of opportunity apan dili makonsiderar nga danyos. “Nagtuo man gud ni ang uban nga adunay ihatag nga kwarta ang gobiyerno tungod sa damages sa ilang isdaan,” matud ni Bojos.

Sa uwahing report sa Provincial Disaster Risk Reduction Management Office, niabot na og P750 mil ang danyos sa mga isdaan sa Sugbo.

Samtang giklaro ni Bojos nga wala maapektahi ang fish stocks nga makuha sa kadagatan bisan sa El Niño tungod kay matud niya ang mga pelagic fish sama sa mga sardinas, mga tulingan ug uban pa modagsa man niining panahona.

Ang tigpamaba sa BFAR-7 nga si Alma Saavedra sa linaing interbyu sa Banat News nagkanayon nga daku og natabang ang pagpatuman og seasonal fish ban sa mga fishing areas sa Kabisay-an mao nga abunda gihapon karon ang suplay sa isda. (BANAT NEWS)