Gitulis, gikandaduhan sulod sa van

CEBU, Philippines - Nawad-an sa kinolektang salapi ang sales agent human gitulis ug gikandaduhan sulod sa giluwanan niyang delivery van kauban sa iyang drayber sa Estaca, Lungsod sa Compostela alas 12 sa udto niadtong Sabado.

Si Police Officer 3 Michael Magallon sa Compostela Police Station niila sa sales agent nga si Lionel Labor Sollano, 35, taga Paknaan, Dakbayan sa Mandaue ug ang driver nga si Reynan Luna Valencia, 32, taga Lungsod sa Compostela.

Matud ni Magallon nga ang residente na sa maong dapit ang nakamatikod sa pagsige og dukdok sa mga biktima ug nagtinabangay sa pag-abli.

Gipaningot ang duha ka biktima gumikan sa hilabihang kainit sa sulod sa van.

Asoy sa mga biktima nga gikan pa sila sa ilang suking mga tindahan ug sa ilang pagbalik sa  gi-parking nilang delivery van kalit lang silang gipangtionan og armas sa tulo ka armadong lalaki dungan ang pagdeklarar nga tulis.

Nakuha ang salapi nga P10,000 nga kinolekta lakip na sa ilang kaugalingong kwarta nga wala matino ang kantidad ug mga cellphones.

Ang tulo ka tulisan nga nagsakay og itom nga motorsiklo ang nagdali sa pagpabulhot paingon sa Lungsod sa Compostela. (BANAT NEWS)