CEBU, Philippines - Naigo sa iyang baba ang usa ka babaye sa gituohang saag nga bala samtang siya nangandam og makaon sa birthday sa iyang inahan niadtong Huwebes sa buntag sa Camp 4, Dakbayan sa Talisay.
Ang biktima nailhan nga si Maricel Nacua, 42 anyos, minyo nga nagpuyo sa nahisgutang lugar.
Si PO2 Othelo Largo sa Talisay City Police Station nagkanayon nga kalit lang nahagba ang biktima ug pagtan-aw sa iyang kabanay nagkadugo na ang baba hinungdan nga gidali sa pagdala sa tambalanan.
Ang bana sa biktima nga si Richard Nacua nitug-an sa kapolisan nga wala sila nasayud kung diin gikan ang bala nga nilusot sa ilang balay.
Si Largo nitataw nga himuon pa nila ang lawom nga imbestigasyon gumikan kay kadudahan nga sa baba naigo ang biktima.
"Naay report nga ang biktima nikasaba na sa iyang 16-anyos nga anak unya ang amahan nilakaw makadiyot ug diha na sila kadungog og buto sa armas," matud ni Largo. Ang biktima dili pa makasulti hangtud karong panahona gumikan kay naa pa kini sa operating room. (BANAT NEWS)