CEBU, Philippines - Nalandig sa tambalanan ang 15-anyos nga lalaki nga gidudahang naunay sa gidala nga armas sa Barangay Calamba, Dakbayan sa Sugbo pasado alas 9 kagahapon sa buntag.
Matud ni Senior Insp. Chuck Barandog, hepe sa San Nicolas Police Station, nga igo lang natapsingan sa tiil ang biktima.
Sumala pa ni Barandog nga sa ila gihimo’ng pagsubay, una’ng nitug-an ang minor de edad nga napusilan siya sa iya’ng amigo nga minor de edad usab apan nahibaw-an sa kapolisan nga naunay ra diay ang biktima. Sigun pa sa laing minor de edad nga nahinabi sa kapolisan nga nagdula-dula og armas ang biktima nga iya sa iya’ng higala hangtud nga kini kalit lang nibuto.
Gumikan sa kahadlok ang biktima una’ng nipasangil nga kini gipusil diha’ng nalandig sa tambalanan.
Wala na usab narekober sa kapolisan ang armas ug wala na usab kini nitug-an sa pangan sa iya’ng higala.
Samtang ang imbestigador sa homicide section sa Cebu City Police Office, SPO4 Rogelio Cañete, nagkanayon nga ang guwardiya na sa tambalanan sa Cebu City Medical Center (CCMC) ang nitawag sa Mobile Patrol Group (MPG) nga nagpahibalo nga adunay nalandig sa tambalanan nga napusilan.
Si Cañete niingon nga naswertehan pa ang minor de edad human igo lang nitapsing ang bala sa iya’ng itlog ug nitapsing usab sa iya’ng paa.
“Kung naigo pa, goodbye unta ang himaya,” matud ni Cañete. (BANAT NEWS)