CEBU, Philippines - Wala’y madawat nga campaign fund si Talisay City Mayor Johnny V. delos Reyes gikan sa Liberal Party.
Kini human gi-endorso sa mayor ang kandidatura ni Davao City Mayor Rodrigo Duterte ug Senador Alan Peter Cayetano.
Matud ni Gobernador Hilario Davide III nga libog ang desisyon ni JVR nga magpabilin sa LP apan dili si Mar Roxas ang iya’ng presidente.
Si JVR sa iya’ng bahin nagkanayon nga wala na siya magdahom nga makadawat pa og pundo gikan sa LP.
“Wa na nako mag-expect pa nga makadawat pa ko, mauwaw na sad ko modawat," matud ni JVR.
Wala usab nabalaka ang mayor kun wala siya’y makuha nga pundo gikan sa partido sanglit matud niya nga bisan wala siya’y kwarta, makadaug gihapon siya tungod kay nakaila na ang mga taga Talisay kaniya.
Matud ni JVR nga sa niagi’ng eleksiyon wala siya’y pundo ug usa ra ang iya’ng kapitan nga nisuporta kaniya apan nidaug gihapon siya.
Matud sa mayor wala kaabot og usa ka milyon ang nagasto sa iya’ng grupo sa niagi’ng piniliay.
"Ang amo’ng motto diri--dawata ninyo ang kwarta (sa ubang partido) pero si JVR lang gihapon ang botohan," sigon ni JVR.
Samtang ang LP sa probinsiya mopahigayon og caravan sa pagsugod sa ila’ng kampanya karong Lunes gikan sa Argao libot sa tibuok probinsiya.
Gikan sa Argao molibot sa Santander paingon sa Dumanjug diin adunay rally.
Sa Martes magsugod ang caravan sa Barili paingon sa Asturias hangtud sa Daanbantayan diin laing rally ang ipahigayon. Sa ikatulo’ng adlaw sa caravan, magsugod ang LP sa Daanbantayan paingon sa Sogod hangtud sa Consolacion sa gabii. (BANAT NEWS)