Selos maoy gisubay sa pagpamusil

CEBU, Philippines - Selos ang nakita nga motibo sa kapulisan sa pagpamusil sa usa ka negosyante sa usa ka sakyanan nga adunay lima ka mga tawo nga sakay diha sa Don Gil Garcia, eskina sa Jose Avila Street, sa Brgy. Capitol Site ning dakbayan sa Sugbo pasado alas 11 sa nakalabay nga gabii.

Giila ang negosyante nga suspetsado nga si Anthony Francis Tan Sy, 43, nga taga Brgy. Pagsabungan sa Dakbayan sa Mandaue.

Samtang ang mga reklamante ug mga biktima mao sila si Janelle Teo, 38, Giam Enriquez, 39, kauban ang laing tulo nila ka mga tawo.

Matud pa ni Police Officer 3 Clifford Manogora, desk officer sa Fuente Police nga nahinabi sa Banat News, selos ang ilang gitan-aw nga posibleng hinungdan sa maong kremin.

Sa spot report gikan sa Fuente Police Station, nasayran nga gikan sa dalan Escario gisundan ang Toyota Fortuner nga giluwanan sa mga biktima og sakyanan nga Foton Thunder.

Sigun pa sa spot report sa kapulisan nga si Teo  mao ang nagmaneho sa sakyanan samtang si Enriquez naglingkod sa front seat.

Ang mga biktima miingon nga pag-abot sa lugar kalit lang nanaog sa sakyanan ang suspetsado ug diretso silang gipamusil niini diha sa bintana.

Apan paspas nga nakapasutoy og padagan ang drayber maong ang bala diha naigo sa bintana ug milapos sa atop niini. Sila si Teo ug Enriquez wala maigo sa bala apan nangasamad sa bildo sa bintana.

Ang mga biktima midiretso og sumbong sa Fuente Police Station hinungdan nga naalarma ang mga police units sa siyudad ug nadakpan si Sy diha sa Sitio Nasipit, Brgy. Talamban, apan wala’y armas nga nakuha gikan kaniya.

Karong adlawa si Manogora miingon nga pasakaan sa mga biktima og kasong attempted murder ang dinakpan nga kasamtangan karong gitanggong sa selda sa Fuente Police. (BANAT NEWS)