Wa tugti manarbaho naghikog

CEBU, Philippines - Patay na nga nakit-an sa silingan ang 18-anyos nga lalaki kinsa gituohang naghikog sa punoan sa sambag sa Calle Rizal, Poblacion, Lungsod sa Medellin sa niagi’ng adlaw.

Giila ang batan-on nga si Jericho Diola, ulitawo ug nagpuyo sa mao’ng dapit.

Ang silingan nga si Edwin Dosdos Jr. ang nakakita nga nagbitay na si Diola diha’ng kini nanguha og kahoy para sugnod.

Dali nga gipahibalo ang uban pa nga mga silingan ug mga ginikanan sa namatay ug nagtinabangay sa pagtangtang sa pisi nga gihigot sa liog.

Gidala sa Rural Health Center sa lungsod si Diola apan ang doktor nga niatiman nideklarar niini nga patay na.

Si Police Officer 3 Mariano Aluba sa Medellin Police Station nga nahinabi sa Banat News niingon nga lagmit nangluod ang batan-on human wala mosugot ang iya’ng amahan nga manarbaho sa usa ka construction sa lungsod sa Madridejos.

Nabantayan nga nagmagul-anon na ang batan-on hangtud nga nakita na lang kini nga naghikog patay.

Si Aluba niingon nga posible’ng ang mga higala sa biktima ang iya unta kuyogan nga manarbaho sa Madridejos apan gumikan kay wala kini nakakuyog hinungdan nga nahiubos.

Sa inisyal nga pagsubay sa kapolisan wala usab sila nakakita og timailhan nga may foul play ang mao’ng hitabo. (BANAT NEWS)