Ilegal nga koral sa Kasambagan demolison

CEBU, Philippines - Susihon karong semanaha sa Cebu City’s Office of the Building Official ang matud pa ilegal nga gitukod nga koral diha sa J. Panis Street sa Brgy. Kasambagan.

Matud ni OBO Chief Engr. Jose Marie Poblete nga mopadala siya og mga tawo aron mo-inspect sa maong lugar tungod kay giingong nisugot na ang tag-iya nga ipaguba ang koral.

Niadtong Enero 19, miluwat ang OBO og notice of violation batok ni Richard Unchuan kinsa maoy tag-iya sa yuta diin adunay koral nga gitukod bisan og wala kini permit.

Kahinumduman nga adunay 70 ka mga residente sa St. Michael Village, Barangay Kasambagan ang nangayo og tabang sa siyudad mahitungod sa maong koral nga maoy nakabara sa ilang agianan  padulong sa Governor M. Cuenco Avenue.

Tungod niini, gi-inspect kini sa taga OBO pinanguloh  an sa area inspector nga si Christopher Miranda kinsa mihangyo ni Unchuan nga mokuha og building permit.

Matud ni Poblete nga mipadala og explanation letter si Unchuan sa iyang opisina kinsa milimod nga sila ang nagtukod sa maong koral.

 “Sa ilang explanation, ingon sila maong wala mikuha og permit kay dili daw to fence and they were not the one who constructed it,” sigon ni Poblete.  (BANAT NEWS)