CEBU, Philippines - Human gideklarar sa konseho sa Dakbayan sa Talisay nga persona non-grata si City Administrator John Yre de los Reyes, isyu sa moralidad na sab ang gituki.
Usa ka resolusyon ang gipasar nga nag-awhag sa Civil Service Commission ug sa Department of Interior and Local Government sa pag-imbestigar kang de los Reyes nga anak ni Mayor Johnny de los Reyes tungod sa taho nga gibiyaan niini ang asawa ug nikuyog og laing nilalang.
Apil sa ipa-imbestigar sa resolusyon nga giduso ni Konsehal Aldin Diaz ang giingong kawani sa buhatan ni de los Reyes nga gihimong drayber sa kulukadidang sa opisyal.
Samtang si John Yre sa iyang bahin nagkanayon nga wala pa siya sa katungdanan nga dili na maayo ang ilang relasyon sa asawa ug gani nisang-at na siya og annulment sa korte.
Apan si Diaz nagkanayon nga ang asawa ni John Yre nahimo pang empleyado sa buhatan sa City Administrator.
Nagtuo hinuon si Diaz nga sa City Hall na nagkita si John Yre ug ang bag-ong kaplag hinungdan sa pagkabungkag sa ila’ng pagpuyo.
Si Bise Mayor Romeo Villarante nagkanayon nga sakto ang gibuhat ni Diaz tungod kay wala sa ilang hurisdiksiyon ang pag-imbestigar.
Sigun pa niya nga gilauman nga mohimo sa imbestigasyon ang mga ahensya nga gihangyo ni Diaz.
Gikompirmar ni Villarante nga nadungog na sa City Hall ang maong taho ni John Yre.
Nagkanayon si Villarante nga isip City Administrator, gilauman nga mohimo siya og mga tarung nga binuhatan ilabi na nga siya ang alter ego sa iyang amahan nga mayor.
Iyang gipasabot nga ang gibuhat ni Diaz mao lang ang pagpahinumdum sa tanang public officials sa balaud. (BANAT NEWS)