Napalgan patay na may pinusilan sa ulo
CEBU, Philippines - Gibuk-an sa ulo ug patay na nga nakit-an ang 36-anyos nga lalaki nga nahagba sa bakilid nga bahin sa Sitio Dita, Pulangbato, Dakbayan sa Sugbo pasado alas 7 kagahapon sa buntag.
Giila ang biktima nga si Elmer Castillon, ulitawo nga taga Sitio Tuburan sa mao’ng barangay.
Si Senior Police Officer 3 Felimeno Mendaros, imbestigador sa homicide section sa Cebu City Police Office, nitug-an nga nakit-an ang biktima sa usa ka Ferdinand Go, usa ka residente kinsa paingon magkabo og tubig.
Una’ng nagtuo si Go nga usa lang ka hubog nga nabuntagan ang lalaki nga nahagba sa bakilid apan sa iya’ng pagsubay naligo na kini sa iya’ng dugo ug adunay samad sa alimpolo.
Sa inisyal nga imbestigasyon, si Mendaros niingon nga anggulo sa drugas ang ila’ng gisundan karon sa krimen human ila’ng nasayran nga tiggamitan og drugas ang biktima.
Katapusang nakit-an ang biktima niadto’ng nakalabay nga hapon ug sakay kini sa usa ka bag-o nga motorsiklo.
Gani niuli pa kini sa ila’ng balay ug nagkuha og laing helmet nga lagmit ipasuot sa iya’ng kauban.
Niadto’ng nakalabay nga kadlawon nakit-an ang gisakyan nga motorsiklo sa biktima nga gisakyan na sa laing tawo nga usa sa ila’ng gitan-aw karon nga lagmit matawag nga suspek.
Gawas sa paggamit og drugas nahibaw-an usab sa kapolisan nga may rekord kini sa pagpanghilabot og mga butang sa iya’ng mga silingan. (BANAT NEWS)
- Latest
