‘No Left Turn’ sa Highway Mandaue
CEBU, Philippines - Laing dry-run ang ipatuman sa kagamhanan sa Dakbayan sa Mandaue sulod sa 60 ka adlaw alang sa tulo ka eskina sa dalan M.C. Briones paingon sa Lungsod sa Consolacion.
Dinhi ipatuman ang “No Left Turn” sa pick hours sa eskina sa Sudlon Maguikay, Tabok ug Paknaan aron makuhakuhaan ang kahuot sa mga sakyanan sa mao’ng mga lugar.
Ang “No Left Turn” traffic scheme ipatuman matag alas 6 hangtud alas 9 sa buntag ug matag alas 5 hangtud sa alas 8 sa gabii.
Aduna’y ipakatap nga mga traffic enforcers aron paggiya sa mga motorista.
Ang mao’ng traffic scheme ipatuman sunod semana.
Matud ni Konsehal Elstone Dabon nga kinahanglan nga masayud ang publiko sa bag-ong traffic scheme aron makabantay sila ug dili na maglibog ang mga motorista kung asa sila pwede moagi.
Si Glenn Antigua, pangulo sa Traffic Enforcement Agency of Mandaue (TEAM), niingon nga dili lang ang Mandaue ang maka-benepisyo niini kung dili ang tanang pasahero ug motorista nga dili malangan sa ila’ng pagbiyahe.
May re-routing usab nga ipatuman sa dakbayan tungod sa road concreting sa A. Soriano Avenue, dalan Plaridel ug ang pag-ayo sa Mactan Mandaue Bridge sa Department of Public Works and Highways. (BANAT NEWS)
- Latest
