CEBU, Philippines - Daghang mga mayor sa kalungsuran ang misumbong sa director sa Cebu Provincial Police Office nga adunay mga polis ug usa kanila hepe sa ilang lungsod ang gidudahang drug protectors ug ang uban gidudahang mao na gayod ang namaligya og drugas.
Si Sr. Supt. Clifford Gairanod, mibutyag sa mga tigbalita nga gitug-anan siya sa mga mayor bahin niini dihang siya nakigtigom kanila dili pa lang dugay.
Niadtong nakalabay nga adlaw dili mominos sa upat ka mga mayor gikan sa norte ang mihatag og impormasyon bahin sa mga polis nga badlongon.
“Naa pay lain bag-o lang niari sa akoa ganihang buntag (kagahapon). Naproblema sila sa drugas kay nagkadaghan. Unya naproblema sila sa polis kay mao kunoy protector,” matud pa sa direktor.
Dugang pa ni Gairanod nga ang maong mga mayor mihatag og tulo ka mga pangalan sa mga non-commissioned police officers ug usa ka opisyal nga giingong nalambigit sa ilegal nga drugas.
Nagdumili pagtug-an si Gairanod kung kinsa kini nga mga polis ug sa asa sila nadestino nga mga lungsod. Insaktong tayming na lang usab ang gipaabot ni Gairanod aron mailhan kining mga badlongon nga polis aron iyang sampolan nga ma-dismiss ug mapriso. (BANAT NEWS)