Opisina sa prinsipal gilungkab

CEBU, Philippines - Gibuslotan ang atop ug kisame sa buhatan sa prinsipal sa Bartolome C. Piañar Memorial National High School sa Barangay Dakit, Lungsod sa Cordova sa wala hiilhing mga kawatan ug gisakiyo ang mga sulod sa iyang cabinet.

Si Police Officer 2 Alejandro Ancao Jr. imbestigador sa Bogo Police Station miila sa  biktima nga mao si Linda Lipiten, 60, ang panuigon nga nagpuyo sa maong dapit.

Natingala ang biktima nga nagkatag na ang iyang mga butang ug guba ang kisame ug nabuslot ang atop.

Nahanaw na ang iyang kuwarta nga P1, 3 00 ug uban pa nga mga butang  sud sa kabinet.

Samtang nawad-an sa iyang salapi, cellphone ug  uban pa nga mga butang usa ka babaye ang gitulis sa duha ka armadong lalaking nagsakay og motorsiklo sa Barangay Cogon, lungsod sa Consolacion sa miaging gabii.

Si Senior Police Officer 2 Pedro Enriquez sa Compostela Police Station miila sa biktima nga mao si Conie Pareja, 25, nagpuyo sa maong dapit kinsa gikan pa sa trabaho ug naglakaw na pauli dihang gihunongan sa duha ka wala mailhing lalaki ug ang backrider  mition og armas ug mideklarar nga tulis.

Gikuha sa maong mga tulisan ang salapi sa biktima nga P700, duha ka cellphones ug uban pa nga mahinungdanong butang niini dayong pasirit palayo.

Ang kapolisan padayon pang naghimo og imbestigasyon sa maong insidente. (Romeo T. Limpangog/EIM)

Brgy workers sa Mandaue gihataga’g insentibo

Nakadawat og cash incentives gikan sa Kapitolyo ang mga tanod, health workers ug day care workers sa kabarangayan sa Dakbayan sa Mandaue.

Matud ni Vice Governor Agnes Magpale atol sa pagpanghatag niini diha sa Subangdaku gym ang madawat sa day care ug health workers dul-an P2,400 ug ang tanod  P1,700.

Ang maong insentibo tabang sa lalawigan sa mga kawani sa kabarangayan nga nagserbisyo bisan sa kagamay sa ilang sweldo.

Gibana-bana nga anaa sa 11 mil ang mga Barangay Health Workers ug dul-an 500 ka mga tanod ang nahatagan sa cash incentives.

Dugang pa ni Magpale nga gipatas-an usab ang retirement age sa mga tanod gikan sa 60 anyos ngadto sa 65 tungod kay aduna pa kini katakos sa pagserbisyo.

Si Julius Rosal nga usa ka barangay tanod mipadayag sa iyang pasalamat bahin sa maong programa kay dako kining tabang para sa iyang pamilya. (BANAT NEWS)