CEBU, Philippines - Gidayeg sa konseho sa siyudad sa Sugbu ang mga tawong niserbisyo alang sa kalampusan sa 51st International Eucharistic Congress nga gipahigayon sa siyudad sa miaging semana.
Atol sa regular sesyon kagahapon, ang City Council miaprobar sa resolusyon nga gipasaka ni City Councilor David Tumulak nga nagtinguhang pasidunggan ang mga pribado ug public agencies nga mitabang sa kalampusan.
Lakip sa gipasalamatan ni Tumulak ang Cebu Provincial Police Office, Cebu City Police Office, City Health Department, Armed Forces of the Philippines, Cebu City Disaster Risk Reduction and Management Office, Provincial Disaster Risk Reduction and Management Council, Association of Barangay Councils, Cebu City Transportation Office, Philippine Red Cross, Emergency Rescue Unit Foundation and All-Terrain Medical Relief Organization, ug uban pa.
Bisan sa kalampusan sa maong aktibidades, matud ni Tumulak nga aduna pay luna sa pag-improve.
Usa niini ang pagpalapad sa kadalanan aron makapahiluna ang nagkadaghang sakyanan sa siyudad.
Dugang niya nga angay hingusgan pa gyud ang public information alang sa mga advisories.
Tungod sa kalampusan, si Acting Cebu City mayor Edgardo Labella masaligon nga kaya gyud sa siyudad mo-host og bisa’g unsang international events.
Si CCTO operations chief Jonathan Tumulak miingon makiangayon pud kung hatagan og insentibo ang mga traffic enforcers, parking aides, ug ubang kawani sa siyudad nga mihatag og additional nga serbisyo alang sa maong event.
Gawas sa IEC, nilampos usab ang siyudad pag-host sa “Mega Sinulog 2016” ug ang Asia Pacific Economic Cooperation meetings sa miaging tuig. (BANAT NEWS)