Pag-ampo sa paralitiko para sa mga anak

CEBU, Philippines - Usa ka amahan nga  nagsungkod nga naglakaw gikan sa Brgy. Sambag II paingon sa Cebu City Hall aron lamang motambong sa Statio Orbis kon Closing Mass sa International Eucharistic Congress (IEC) diha sa South Road Properties.

Matud ni Antonio Estera nagpuyo sa bukirang barangay sa Bonbon ning dakbayan, wa niya panumbalinga ang paglakaw og layo aron lang pagtambong sa talagsaon nga kalihokan sa simbahan.

Saysay pa ni Estera nga desidido gyud niyang motambong sa misa sa SRP bisan pa man nga paralisado na ang katunga sa iyang lawas human siya na-stroke niadtong tuig 2012.

Plano niyang lakawon gikan sa ilang barangay sa Bonbon gibanabanang 17 kilometros padung sa Cebu City Hall diin adunay mga bus nga libreng masakyan padung sa SRP.

Apan samtang siya nagbaktas padulhog, mapasalamaton siya kay adunay naluoy kaniya ug gipasakay siya hangtud sa Sambag II sa downtown area.

Niadtong tuig 2012, diin giatake siya sa sakit sa kasingkasing ug tungod niini nahimo siyang imbalido ug nahunong na sa pagpamasahero isip drayber sa habalhabal nga maoy iyang gibuhi sa iyang duha ka mga anak nga nag-edad og 12 ug 9 anyos. Biyudo na si Estera human nitaliwan iyang asawa pipila ka tuig na ang nilabay, ug sukad nga naimbalido siya, wala na niya mahatag sa iyang mga anak ang ilang panginahanglan.

Apan wala siya kawad-i sa paglaom ug nagtuo siyang makita sa Kahitas-an ug madungog Niini ang iyang pag-ampo nga maayo siya ug makabalik sa pagtrabaho para sa iyang mga anak.

Matag semana mokanaog gyud siya gikan sa bukid aron lamang moadto sa San Vicente Ferrer sa Barangay Sambag II aron magpa-therapy sa mga tinun-an sa usa ka unibersidad nga nagboluntaryo sa maong sentro nga libre.

Dihang iyang nahibaw-an ang bahin sa International Eucharistic Congress nga dinhi sa Sugbo himuon, gusto gyud niyang makatambong bisan kausa lang ka higayon ilabi na ang pagpaminaw sa Santos nga Misa.

Matud niya sa pagtambong niya sa kataposan nga misa sa IEC dili niya kini makalimtan sa tibuok niyang kinabuhi ug iyaha kining isipong usa ka bahandi nga dili kabayran.

Atol sa homiliya ni Papal Legate Charles Maung Cardinal Bo, nakahilak si Estera diha sa kilid sa railings diin siya mipuwesto. Dihang gipangutana kun hain bahina siya natandog, matud pa niya ang kabahin sa kamahinungdanon sa pamilya ug sa kabataan.

Kini tungod kay aduna siyay mga anak nga gusto niyang mahatagan og maayong kaugmaon.

Matud niya nisakripisyo siya pagtambong sa misa aron magampo aron siya makabalik sa normal niyang paglihoklihok aron makatrabaho pagbalik. Ug labaw sa tanan aron mangayo og tabang sa Kahitas-an nga unta adunay tawong motabang sa iyang mga anak aron sila makatungha tungod kay sa pagkakaron dili pa niya kini mahimo tungod sa kakulian sa iyang lawas.

Sagad sa mga nitambong sa Statio Orbis nagtuo nga duol kaayo kanila ang Ginoo nianang mga orasa. (BANAT NEWS)