CEBU, Philippines - Kapin sa P50 mil nga salapi ang nadala sa mga kawatan human gilungkab ang buhatan sa Norkis sa Poblacion, Lungsod sa Moalboal niadto’ng nakalabay nga kadlawon.
Pasado alas 8 na sa buntag nabantayan sa usa sa mga trabahante nga si Marilyn Simbajon nga naguba na ang kilid sa roll-up door.
Sa pagsubay ni Simbajon iya’ng nakita nga natangtang na ang duha ka kandado sa matag kilid sa roll-up door nga gituohang gigamitan og vault cutter. Sa sulod nakita ni Simbajon nga naguba na usab ang doorknob sa iya’ng opisina nga gidudahang giligwatan og gahi nga butang diin nahanaw na usab ang kapin sa P50 mil nga gisulod sa vault.
Human nadisku-brehan ang mao’ng hitabo dali usab dayon nga nidangop sa buhatan sa kapolisan si Simbajon.
Sumala pa ni Police Officer 3 Edwin Ellut, desk officer sa Moalboal Police Station, nga hangtud karon wala pa sila’y nasikop nga responsable sa krimen.
Nasayran usab sa pakisusi sa kapolisan nga wala’y guwardiya matag gabii ang buhatan ug wala’y closed circuit television (CCTV) camera.
Duna’y gitaud nga “signal alarm” sa sulod apan giputol sa kawatan ang wire hinungdan nga wala kini nakatingug.
Nagduda ang kapolisan nga dili lang usa ka tawo ang nihimo sa krimen diin lagmit ila gyud nga gitun-an ang mao’ng hitabo.
Sa dugang pakisusi sa kapolisan, 44-anyos nga babaye ang nahinabi nga kini nakadungog og lagubo sulod sa establesamento pasado alas 3 sa kadlawon samtang kini natulog duol sa gilungkaban apan wala lang kini nanumbaling kay kini nagtuo nga mga trabahante ra.
Pipila ka minutos ang nilabay usa ka andar sa motorsiklo ang iya’ng nadungog nga nibiya nga gidudahang gisakyan sa mga kawatan. (BANAT NEWS)