CEBU, Philippines - Bisan wala pay kasigurohan kun asa gyud himuon ang Statio Orbis nga mao ang kataposang Santos nga Misa alang sa 51st International Eucharistic Congress (IEC) karong Domingo diha sa South Road Property (SRP), ang dakbayan nanagana na lang daan pag-andam sa lugar. Ang SRP Manager Roberto “Bo” Varquez miingon nga gipamutang na nila ang mga lingkuranan alang sa choir ug ingon man ang mga speakers.
Aron usab dili kaayo magkalapok ang mga manimba nunot sa nasinating pagsige og uwan-uwan, gihinay-hinayan nila pagtambak og graba ang lugar.
Ang katawhan nga motambong sa misa giawhag nga magdala og kaugalingong raincoats nga proteksyon gikan sa uwan kay gidili ang pagdala og payong.
Gawas sa raincoats gihangyo ni Cebu City Acting Mayor Edgardo Labella nga magdala usab og tubig.
Gilauman nga mokabat ngadto sa usa ka milyon ka tawo ang mosalmot sa misa human gikanselar ang tanan nga misa sa Archdiocese of Cebu karong Domingo. Una nang gipahibalo ni Msgr. Joseph Tan nga nabalaka sila kun magpadayon ang dautang panahon sa adlaw nga Sabado ug Domingo ug posibleng adto na lang himuon sa Cebu City Sports Complex kini himuon.
Apan tungod sa kadako unya sa trabahuon pagbalhin-balhin sa mga gamit dako ang posibilidad nga adto gihapon kini sa SRP mahitabo, gihimo nilang basehan ang pagbisita ni Pope Francis sa Palo, Leyte sa niaging tuig nga diin adunay bagyo sa dapit, apan malampuson ug luwas kining napahigayon.
Ang Department of the Interior and Local Government (DILG)-7 niawhag usab sa mga tawo nga moapil usab sa misa diha sa Kapitolyo karong hapon ug sa Domingo diha sa SRP. Giawhag usab sa DILG ang publiko nga kanunay mobasa sa mga pamantalaan ug maminaw sa mga sibya sa radyo kabahin sa posibleng mga kausaban nga himuon.
Samtang ang Cebu City Transportation Office (CCTO) mipahimangno sa mga motorista nga mosayo sa pag-agi sa SRP tungod siradohan na kini sa mga sakyanan sugod alas 10 sa buntag ug ablihan pagbalik inig kahuman sa Misa.
Mamahimong mo parking ang mga sakyanan diha luyo sa Senior Citizen’s Park ug sa SRP Kasadya Ground, samtang ang kadagkoan sa SM Seaside mitanyag sa ilang parking area.
Kagahapon sa buntag gituki ang pagbutang og 30 ka mga stalls sa SRP aron adunay mapalitan og tubig ug pagkaon ang mga tawo atol sa misa. (BANAT NEWS)