Mga tulda giandam sa Youth Day vigil

CEBU, Philippines – Giandam na sa kagamhanan sa Dakbayan sa Mandaue ang mga tulda nga kapasilongan sa kapin 5,000 ka delegado nga mga batan-on nga magpahigayon sa ila’ng pagbilar sa bakanteng luna sa Mandane Bay sa reclamation area karong Huwebes sa gabii.

Si Roger Paller, public information officer sa  dakbayan, niingon nga kasamtangan nila’ng gihimo ang pagtapok sa mga tulda gikan sa 27 ka barangay isip pagpangandam kung mag-uwan sanglit wala’y istraktura ang lugar.

Atol sa kalihukan mohatag og kalingawan ang Mandaue Children’s Choir ug ang San Diego Dancers.

Pagahimuon sa mao’ng lugar ang Santos nga Misa sa alas 5 sa buntag sa Biyernes una mobiya ang mga delegado padulong sa Dakbayan sa Sugbo sakay sa mga bus.

Ang mga delegado mosalmot sa Jericho Walk nga manukad sa Hoops Dome sa Dakbayan sa Lapu-Lapu sa alas 3 sa hapon karong Huwebes subay sa 1st Mactan Mandaue Bridge liko sa wala sa dalan Plaridel ug Andres Soriano Avenue dayun sa Mandane Bay.

Ang Traffic Enforcement Agency of Mandaue (TEAM) nipahibawo sa pagsirado sa mga dalan nga nagpadulong sa dalan Plaridel ug C.D. Seno sugod sa alas 2 sa hapon hangtud sa alas 6 sa gabii.

Ang dakbayan sa Lapu-Lapu preparado na sab sa pag-abot sa mga batan-ong delegado diin usa ka welcome dinner ang ipahigayon karong gabii.

Matud ni Nicole Balao, executive assistant sa Lapu-Lapu City Tourism Office ug usa sa mga IEC coordinators, nga ang tibuok parokya sa dakbayan ang iyahay og pangandam nga makahatag og kalingawan sa mga delegado.

Sirad-an ang karsada duol sa simbahan sa Mactan tungod sa ipahigayon nga welcome dinner.

Atol sa Jericho Walk, ang mga motorista gikan sa Cordova ug Babag moagi sa S. Osmeña Street duol sa Tamiya, Basak ug subayon ang tuong bahin sa dalan sa Maximo V. Patalinghug  Avenue padulong sa ila’ng destinasyon.

Samtang ang mga motorista gikan sa Barangay Mactan ug Punta Engaño moagi sa access road sa Sitio Angasil.

Ang mga dagku’ng truck paagion sa General Aviations Road duol sa Carmelite School sa Buaya.

Samtang giawhag sa Provincial Disaster Risk Reduction and Management Office (PDRRMO) ang publiko nga manambong sa kalihukan sa IEC nga magdala og payong ug rain coat ilabi na sa kalit nga uwan.

Karong Biyernes sa alas 4:00 sa hapon adunay misa atubangan sa Kapitolyo may kalambigitan sa IEC. – /GMR) (BANAT NEWS)