DILG Sec. nisusi sa IEC venues

CEBU, Philippines – Ni-inspeksyon si Department of Interior and Local Government (DILG) Secretary Mel Senen Sarmiento sa mga lugar diin gipahigayon ang mga kalihukan sa 51st International Eucharistic Congress.

Kini aron pagseguro nga luwas ang liboan ka mga delegado.

Giangkon ni Sarmiento nga nabalaka sila sa sitwasyon unya sa kalihukan diha sa Dakbayan sa Mandaue gumikan sa sagunson nga pag-uwan nga gikataho’ng molungtad pa hangtud sa adlaw’ng Huwebes.

Matud ni Sarmiento nga dili haum ang giandam nga Mandane Bay diin ipahigayon sa mga batan-ong delegado ang pagbilar human sa Jericho Walk gumikan kay lapok ang lugar.

Gisusi usab niini ang sitwasyon sa South Road Properties diin ipahigayon ang Statio Orbis karong Domingo sa alas 4 sa hapon. Samtang sa iya’ng pagtuyok sa IEC Pavilion nakauyon kini sa gipatumang seguridad dungan sa pag-ingon nga daku og natabang ang APEC Summit nga gihimo sa Sugbo sanglit nasayud na man sa mga angay palambuon.

Tuyo’ng gipaanhi sa Sugbo si Sarmiento ni Presidente Benigno Aquino III aron pagsusi sa IEC ug gipaabot usab si Chief PNP Director General Ricardo Marquez nga moanhi sa Sugbo aron pagsusi sa kalihukan.

Adunay gitawg nga ‘’Red Team’’ nga mosuroy sa mga nagkadaiyang lugar ug sila ang silbi’ng kritiko aron mahibaw-an kun unsa pa’y angay palambuon.

Wala’y kompiyansa ang mga awtoridad batok sa mga nagtinguha nga motisok og kagubot sa kalihukan.

Panawagan nila sa publiko nga magtinabangay kay gikinahanglan usab nila ang kooperasyon sa katawhan. – /GMR) (BANAT NEWS)