“Made in Mandaue” nga mga produkto gihugopan

CEBU, Philippines – Gihugopan sa mga dumuduong ang mga ginama nga produkto sa Dakbayan sa Mandaue nga gibaligya  diha sa dalan A. Soriano Avenue kilid nga bahin sa Mandaue City Cultural and Sports Complex sa Sitio Tribunal, Brgy. Centro.

Ang maong mga stalls nasumpay sa merkado publiko sa dakbayan nga nahimutang usab sa maong lugar .

Ang mga giladlad naglakip sa mga dekalidad nga produkto sama sa customized RTWs ug mga delicacies nga masareal, bibingka, budbod, polvoron, binangkal ug tagaktak.

Kadtong gustong mamalit nga nagdala og sakyanan, mahimong maka-parking sa giandam nga parkingan sa lugar.

“It’s an opportunity for our home –made products to be exposed more to the market,” nagkanayon si Ramil Villareal nga maoy naggama ug nagbaligya sa malungay polvoron ug peanuts.

Ang asawa ni Villareal nga mao si Rovelyn Villareal maoy nahimong grand prize winner sa Mandaue Chamber of Commerce and Industry “Search for Outstanding Women Business Entrepreneurs” sa niaging tuig.

Ang ilang produkto nalakip usab sa mga giladlad atol sa Asia-Pacific Economic Cooperation APEC meeting didto sa Manila.

Ang pagpangladlad sa mga produkto nga gigama gikan sa kabarangayan sa Dakbayan sa Mandaue unang gihimo niadtong Agosto 17 sa City Time Square ug gisundan usab sa Park Mall niadtong Disyembre 11 sa miaging tuig.

Ang tumong niini nga makita ug mailhan ang mga produkto nga ginama sa mga Mandauehanon. – /EIM) (BANAT NEWS)