Laing taxi driver gitulis sa pasahero
CEBU, Philippines – Nagkurog ang usa ka taxi driver nga nitunol sa iya’ng kinitaan ngadto sa nagbinugtong nga tulisan kagahapon sa kadlawon sa Huyong–Huyong, Bacayan, Dakbayan sa Sugbo.
Si Jomar Alcontin Caballero, 29, residente sa Paknaan, Mandaue City, ug drayber sa JTY 2951 taxi nga may plate number GXR 933, ang nitaho sa Talamban Police Station human sa pagpanulis.
Matud ni Caballero nga nisakay kaniya ang tulisan gikan sa Tipolo, Mandaue City paingon sa Huyong-Huyong.
Pag-abot nila sa nahisgutang lugar, kalit lang nition og kutsilyo ang mao’ng pasahero dayong deklarar og tulis.
Sa kahadlok nga duslakon sa kutsilyo, gihatag ni Caballero ang iya’ng kinitaan nga P1,500.
Sa follow-up operation nga gipahigayon sa kapolisan, nasikop ang suspek nga giila sa pangan nga Joe Gumalan Papa, 27, molupyo sa Tabok, Mandaue City.
Gitanggong na sa selda sa Talamban Police Station ang suspek samtang nagpaabot sa tukma’ng kaso nga ipasaka. – /GMR) (BANAT NEWS)
- Latest
