CEBU, Philippines – Giawhag sa Cebu City Disaster Risk Reduction and Management Office ang mga opisyal sa Barangay Duljo Fatima nga dili usa patukuran og balik ang luna nga nasunugan.
Kini gumikan kay gisusi pa sa Department of Engineering and Public Works ang posibilidad nga reblocking tungod sa kahuot sa lugar.
Matud ni CCDRRMO research and planning head Harold Alcontin nga kinahanglang tan-awon pa kun luwas pa ang dapit una pa ang reblocking nga himuon sa Department of the Welfare of the Urban Poor.
Hinuon gipasabot sa pangulo sa DWUP, Atty. Collin Rosell, nga ang reblocking dili kinahanglan apan magdepende sa sitwasyon labi na kung ang mga duol nga istruktura dili na luwas.
Dugang ni Rosell nga dili usab basta-basta makaingon nga luwas ang kabalayan palibot sa dapit kun kini wala pa’y pagtugot gikan sa Office of the Building Officials (OBO).
Nikabat sa 45 ka panimalay ang naugdaw niadto’ng Domingo sa hapon sa maong lugar diin adunay 290 ka indibidwal ug 67 ka pamilya ang nawagtangan og panimalay ug kasamtangang gipapuyo sa San Nicolas Elementary School. – /GMR) (BANAT NEWS)