CEBU, Philippines – Nasakmit sa mga sakop sa meat task force ang 141 ka manok nga wala pa naihaw sa ihawan sa Siyudad sa Talisay sulod sa buwan sa Enero.
Si Dr. Santiago Hortel, city veterinarian, nagkanayon nga klase-klase lang nga mga negosyante ang ila’ng nasakmitan sa mga manok nga gipangbaligya sa merkado sa Tabunok.
Gihulma ang task force aron motutok sa mga karne’ng wala moagi sa proseso sa ihawan.
Sila si Hortel ang niila lang og usa ka ihawan sa Talisay nga nahimutang sa Barangay Biasong. Nahimo’ng best meat establishment sa Rehiyon-7 ang ihawan sa Talisay niadto’ng tuig 2009.
Si Hortel nagkanayon nga ang mga negosyante nga nanag-iya sa mga nasakmit nga mga manok ang pakyas sa pagpresentar sa ila’ng mga permit pagmatuod nga kini niagi sa ihawan sa Talisay.
Base sa Republic Act 10536 o ang "The Meat Inspection Code of the Philippines" nga ang masakpan nga magpalusot og mga karne ang adunay multa nga P400,000 ngadto sa P1 milyon samtang kung kini mapamatud-an hayan adunay pagkabilanggo sa unom ka tuig ngadto sa 12 ka tuig.
Dugang ni Hortel nga magpadayon ang ila’ng grupo sa pagsakmit sa mga karne’ng wala’y permiso aron nga luwas nga kan-on sa mga mamalitay sa merkado sa Tabunok. – /GMR) (BANAT NEWS)