CEBU, Philippines – Naglaum si Naga City Mayor Valdemar Chiong nga ang iyang mga proyekto mahuman gyud karong tuiga.
Si Mayor Chiong miingon nga mapadayon na unya pagtukod ang ulahing phase sa ilang boardwalk nga maoy modugang sa kanindot sa ilang plaza nga masuroyan sa katawhan. Ang laing proyekto nga gipaningkamotan ni Chiong nga mahuman mao ang ilang merkado nga makaakomodar og daghang tawo aron nga dili na kini magkatag sa pagpaninda sa daplin sa karsada.
Matud ni Chiong nga aprobado na ang ilang P650 milyones nga budget karong tuiga.
Ang mayor miingon nga kun dili man gani mahuman ang iyang tanang mga proyekto, naglaum siya nga mapadayon kini sa musunod nga mayor sa dakbayan sa Naga.
Si Chiong anaa na sa ikatulo nga termino ug dili na makalansar pagbalik sa sama nga katungdanan.
Gituboy hinoon ni Chiong ang iyang abogada nga anak, si Kristine Chiong, aron maoy mupuli sa iyang pwesto ug mapadayon ang gitinguha niya nga mga proyekto.
Gitataw ni Mayor Chiong nga ang prioridad usab sa iyang anak, kun mapili, mao ang pagpalambo sa serbisyo sa panglawas ug sa edukasyon. – /RUB) (BANAT NEWS)