CEBU, Philippines – Upat pa lang ka mga delegado sa 51st International Eucharistic Congress (IEC) ang nagparehistro aron anha mopuyo sa Devotee City tapad sa Compania Maritima duol lang usab sa Cebu City Hall.
Kini maoy gibutyag ni Erik Cabatino, usa sa mga tinugyanan sa Devotee City. Matud niya singko mil ka mga tawo ang ilang gipaabot nga mopahimulos sa pasilidad.
Gituyo kini aron adunay temporaryong kapuy-an ang mga delegado gikan sa lagyong lugar nga naglisod sa pagpangita og kapuy-an dinhi samtang nagpadayon ang IEC. Ang Devotee City pinatuyo og tukod sa siyudad matag pista sa Senyor Sto. Niño apan tungod sa IEC, wala kini tangtanga sa siyudad sa tinguha nga makatabang sa mga delegado. Ang pasilidad adunay libreng tubig, pansayan, lutoanan ug 24 oras nga gibantayan. Aduna usab mga representante sa Kapitolyo ug Department of Social Welfare and Development nga moabag kanila.
Nasayran usab nga 600 ka mga delegado ang nagpuyo sa pipila ka mga pamilya sa Dakbayan sa Sugbo matud pa ni Msgr. Ruben Labajo ang chairman sa host families nga nahinabi sa Banat News.
Sumala pa ni Labajo, andam gihapon sila modawat og mga delegado, basta adunay mga rekomendasyon sa mga obispo ug kaparian nga sila walay kapuy-an dinhi sa Sugbo.
Sa pikas bahin, giandaman usab og 120 ka folding beds sa city hall ang mga street vendors ug mga tawong anha mangatulog sa sidewalks diha sa Compania Maritima tupad sa Devotee City. – /EIM) (BANAT NEWS)