CEBU, Philippines – Tungod lang sa komedya, gidunggab sa usa ka lalaki ang iya’ng kaubang mamulkitay sa Sitio Rabaya, Barangay San Roque, Siyudad sa Talisay niadto’ng Sabado sa buntag.
Ang biktima mao si Jessie Ronato, 24-anyos, ulitawo nga taga Kimba, San Roque samtang ang suspek ang nailhan nga si Ernie Delfin, hingkod nga taga Barangay Tanke sa mao’ng dakbayan.
Si SPO2 Yvonne Ilustrisimo, imbestigador sa Talisay City Police Station, nagkanayon nga ang suspek ang pirme na’ng bugal-bugalan sa iya’ng mga kauban lakip na ang biktima tungod sa iya’ng batasan nga mura og aduna’y gamay.
"Ila man gud ni’ng gisungog ang suspek unya dili seguro gusto nga komedyahan, nanunggab na nuon," matud ni Ilustrisimo.
Matud niya nga nitumaw una ang panaglalis sa duha ug kalit nga nikuha og kutsilyo ang suspek dayon dunggab sa biktima kinsa samdan sa wala nga dughan ug wala nga bukton.
Gidala sa Talisay City Hospital ang biktima sa iya’ng mga kaubang mamulkitay samtang ang suspek ang dali nga nisibat.
Asoy ni Ilustrisimo nga gibalhin sa Vicente Sotto Memorial Medical Center ang biktima human nakita nga grabe ang mga naangkong samad niini.
Gikatakda’ng pasakaan og kaso ang suspek karong adlawa. – /GMR) (BANAT NEWS)