Talisay zero rabies sa 2015

CEBU, Philippines – Gipasigarbo ni City Veterinarian, Dr. Santiago Hortel, nga negatibo sa rabies ang Siyudad sa Talisay sa niaging tuig.

Iyang gihulagway nga tungod kini sa ilang subsob nga pagpanakop sa mga iro nga libud-suroy.

Si Hortel nagkanayon nga ang ilang impounding team ang naglihok matag adlaw ilabi na og adunay mga hangyo gikan sa katawhan tungod sa nagkagrabe nga mga libud-suroy nga mga iro nga posible pang makapaak sa mga tawo ug makamugna og rabies. Gani sa ilang impounding area sila maka-terminate og 60 ka dinakpang iro matag semana.

Multa nga P75 kung kini kuhaon sa tag-iya base sa ordinansa sa siyudad kalabot sa pag-regulate sa pagbuhi og iro.

Gani ang ilang pagdakop sa mga iro nga nagbadhas lang sa karsada ang nagpadayon hangtud karon apan kung naay pagpanakop sa mga iro nga wala giatiman sa mga tag-iya, aduna sa’y mga tawo nga mapinanggaon og mga iro.

Ang magpa-injection sa iro batok sa rabies ang wala’y bayad kun kini adto magpa-schedule sa barangay apan ang dili makapaabot molahos sa ilang buhatan ug mobayad sa vaccination.

Nagkanayon si Hortel nga ang mga tawo nga moatiman og mga iro ang angay sab nga responsable nga mahimong amo sa iro aron wala’y ubang tawo nga mapwerhisyo labi na og ang iro sobra ka maldito.

Sa 2014, ang Dakbayan sa Talisay nakatala og duha ka kaso sa rabies. Nanghinaut si Hortel nga karong tuiga mahimo gihapong rabies-free sama sa 2015. – /GMR) (BANAT NEWS)