CEBU, Philippines – Tungod sa kalagot nga gigamit ang iyang butang sa iyang igsuon, naghikog patay ang usa ka lalaki nga napalgang nagbitay sa punoan sa kahoy pasado alas 7 sa niaging buntag sa Poblacion, Lungsod sa Borbon.
Nagbitay na sa kahoy nga nakit-an si John Cadar Arnejo, 18, pipila ka metros gikan sa balay niini sa Sitio Dao.
Ang inahan sa namatay ang nitaho sa kapolisan sa hitabo.
Base sa imbestigasyon ni Senior Police Officer 1 Rey Suson nga samtang naglakaw ang amahan sa namatay sa maong lugar, iyang nakit-an nga nagbitay ang iyang anak sa kahoy.
Apan diha’ng nanawag siya og tabang igo na lang sila sa pagtangtang sa pisi nga gihigot niini sa iyang liog.
Dihang naabot ang taga Municipal Health Office, gideklarar nga patay na ang mao’ng lalaki. Base sa asoy sa amahan sa namatay nga nasuko si Arnejo nga gigamit sa iyang maguwang ang iyang butang sayo sa niaging buntag.
Nagtoo lang ang amahan nga naulian na ang iyang anak tungod kay nananghid kini nga mangahoy.
Usa ka oras na lang ang nilabay nga wala gihapon kini mahibalik, gisubay sa amahan kun asa padulong ang iyang anak.
Nakurat na lang siya sa iyang nakit-an nga nagbitay na ang iyang anak sa punoan sa kahoy nga wala na’y kinabuhi.
Gitambagan sa kapolisan ang amahan nga ipa-autopsy ang patay’ng lawas apan kombinsido kini nga naghikog gyud ug dili na siya mosugot nga hiwaon pa ang lawas sa iya’ng anak. – /GMR) (BANAT NEWS)