Delegado gikan Canada nakigpaniudto

CEBU, Philippines – Mokabat og 1,020 ka mga bata kuyog sa pipila ka mga pamilya nga sakop sa “Poorest of the Poor” gikan sa Dakbayan sa Mandaue, Lapu-Lapu ug Sugbo ang niapil sa Table of Hope nga gipaluyohan sa mga delegado gikan sa Vancouver, Canada.

Matud pa ni Mark Palanca, sa Ugnayan ng Barangay at Simbahan, sa Archdiocese of Cebu, nakigsandurot kanila ang Archdiocese of Vancouver.

Sumala pa ni Palanca, usa ka libo lang ilang gitarget apan nisobra ang nanambong gikan sa mga barangay San Antonio, San Roque, Tinago, ug Tejero sa Dakbayan sa Sugbo. Samtang sa Mandaue, nagagikan sila sa Guizo ug Mantuyong ug ang sa Lapu-Lapu gikan usab sa Mactan ug Pajo.

Gipadayag ni Palanca nga usa gayud ka paniudto ang ilang giandam kuyog sa mga delegado sa Canada ug sa mga pamilya nga pinili kuyog sa ilang mga anak. Gawas sa libreng paniudto nakadala usab sila og mga bags of goodies.

Gipahibalo usab ni Palanca, nga adunay mga bata nga niapil nga mga libudsuroy nga kalakip sa mga delegado sa 1st Communicants nga mahitabo karon Enero 30 diha sa Cebu City Sports Center.

Si Nards Pedreno, 9-anyos nga anaa lang magtambayan sa gawas sa Redemptorist Parish Church nagpasalamat sa grasya nga ilang nadawat kay nakakaon sila og lamian nga dili salin sa ubang tawo nga maoy ilang naandan gikan sa pagpanglimos.

Samtang si Archbishop J Michael Miller, CBB, nipadayag nga dako kaayo ang iyang kalipay nga nakig-uban kanila ang mga tawong kabus tungod kay anha makita si Kristo sa ilang panagway.

Gipadayag ni Miller nga usa ka maayong kalihukan ang pakigsandurot sa mga kabus sa dili pa buksan ang 51st International Eucharistic       Congress.

Sumala pa ni Miller, angayan pasidunggan ang nagdumala sa maong kalihukan, tungod kay si Jesus tinud-anay nga mahigugmaon ngadto sa mga kabus. – /EIM) (BANAT NEWS)