CCTO enforcers hatagan og insurance
CEBU, Philippines – Hatagan og libreng insurance ang mga traffic enforcers sa Cebu City Transportation Office (CCTO) sa Rotary Club of Cebu Port Center ug Cebu Insurance Company.
Kini human nakita ni Pioneer Insurance vice president Bienvenido “Jun” Falcon nga nagkinahanglan gyud nga hatagan og insurance ang mga enforcers.
Matud ni Falcon nga adunay P50 mil nga inisyal nga madawat ang mga enforcers gikan sa Rotary Club of Cebu. Dugang P100 mil nga accident insurance gikan sa Cebu Insurance Club diin makaangkon og kinatibuk-an nga P150 mil nga accident insurance ang 300 ka traffic personnel sa CCTO.
Giklaro ni Falcon nga ang P100 mil nga insurance gikan sa Cebu Insurance Company alang sa tanang personnel sa CCTO kinsa lakip na niini ang mga anaa sa buhatan.
Ang presidente sa Rotary Club of Cebu Port Center, Dr. Jose Unabia, nagkanayon nga kini dakong tabang ug nakita usab nila nga anaa pirme sa peligro ang kinabuhi sa mga enforcers ilabi na nga anaa sila kada adlaw sa karsada.
Gawas sa accident insurance, tug-an ni Unabia nga nasabutan sa uban nga taga Rotary Club nga hatagan usab og P100 mil nga accidental death insurance ug natural death insurance ang tanang personnel sa CCTO. Nagkanayon si Unabia nga ang nakaaghat kanila sa paghatag og libre nga insurance mao ang ilang pag-malasakit sa mga enforcers.
Si CCTO operation head Jonathan "Joy' Tumulak mapasalamaton nga mahatagan og libre nga insurance ang tanang traffic enforcers.
Gawas sa libre nga insurance, una nang nagpahibalo si Unabia nga hatagan og P150 mil nga life insurance ang “most outstanding traffic enforcer” nga pilion karong Hulyo. – /GMR) (BANAT NEWS)
- Latest
