Publiko giawhag sa DILG pagsuporta sa 51st IEC

CEBU, Philippines - Giawhag sa Department of Interior and Local Government -7  ang publiko nga suportahan ang pag-host sa nasud sa ika- 51st  International Eucharistic Congress  nga himuon sa Enero 24-31 sa mga dakbayan sa Sugbo, Mandaue ug Lapu-Lapu.

Matud pa ni DILG- 7 regional director, Rene Burdeos, usa ka Multi-Agency Task Group nga gitawag og “Task Group Cebu” ang gi-organisar alang sa kaluwasan, seguridad ug kahapsay sa maong dakong kalihokan sa maong mga siyudad.

Matud pa ni Burdeos adunay mga dagkong mga dalan nga sirad-an, adunay mga rerouting nga ipatuman ug adunay mga eskuylahan nga walay klase subay sa direktiba sa DepEd.

Giawhag usab niya ang tanan nga patas-an ang ilang pasensiya ug palapdan ilang salabotan tungod sa kausaban tungod kay kinahanglan kining himuon alang sa kasigurohan sa maong kalihokan ilabi na sa transportasyon sa mga langyaw ug lokal nga delegado.

Gibanabanang mokabat 15 mil ka delegado, usa ka Papal Legate, tulo ka Papal Nuncios, 20 ka Cardinals, 30 Archbishops ug 120 Bishops ang gipaabot nga   mangabot sunod semana.

Moabot og usa ka milyon ka tawo ang gipaabot nga motambong sa kataposang bahin sa kalihokan nga himuon diha sa South Road Properties.

Gipahimangnoan usab ni Burdeos ang mga motorista ug sumasakay nga maminaw ug mobasa sa mga kausaban sa balita bahin sa IEC matag karon ug unya  gikan sa lokal nga kagamhanan sa dakbayan sa Sugbo, Mandaue ug Lapu-Lapu aron di sila mahasol.

Kinahanglan usab nga magmatngon ang publiko sa ilang personal nga seguridad sama sa pagsumbong kung dunay kadudahang mga tawo, mga butang nga ilang makita, dili magsuot og mahalong mga butang ug di magdala og mahalong gadgets, magdala og tubig atol sa kalihokan.

Samtang giawhag usab niya ang Philippine Coast Guard Central Visayas nga mandoan ang mga shipping companies paggawas og advisories aron pahibaw-on ang ilang mga pasahero bahin sa rerouting aron di mahasol ilang mga pasahero.

Sa laing bahin, gipasalig ni Sr.Supt. Rey Lyndon Lawas nga di maapektahan ang preparasyon sa kapolisan nunot sa paghulip sa mga director sa Mandaue City Police Office ug Lapu-Lapu City Police. Una nang gihulipan og director ang Cebu City Police Office sayo niining bulana.

“Dili ma-affect if the plan is there. It’s just a matter kung kinsa ang mu-implement. It’s okay, no problem (kay) dali ra ma-adjust,” matud ni Lawas.

Si Sr. Supt. Armando Radoc gihulipan ni Sr. Supt. Arnel Amor Libed, kanhi hepe sa Directorate  for Research and Development sa Camp Crame, si Radoc ibutang sa Regional Plans and Operations Division sa Police Regional Office-7.

Samtang gihulipan usab ni Sr. Supt. Jonathan Cabal sa Mandaue City Police Office si Sr. Supt. Mariano Natuel Jr. nga ibalhin na sa Negros Island Region.

Kalabot sa maong balita, andam na sa ipahigayong misa diha atubangan sa Kapitolyo karong Enero 29, 2015  matud pa ni Ramil Abing, assistant provincial administrator. (BANAT NEWS)