120 obispo nangabot

CEBU, Philippines - Nangabot na dinhi sa Sugbo ang 120 ka mga obispo nga sakop sa Catholic Bishop Conference of the Philippines sugod pa niadtong Enero 20 alang sa unang adlaw sa International Eucharistic Congress Theological Symposium.

Ang symposium gihimo diha sa Cebu Doctor’s University Campus sa North Reclamation Area sa Dakbayan sa Mandaue nga gitambongan sa mga obispo.

Matud pa ni Fr. Charles Jayme, sakop sa adhoc committee sa 51st IEC nga karong adlawa himuon ang CBCP Plenary Assembly.

Sumala pa ni Jayme, aduna pay mga obispo nga  wala pa nakaabot apan misaad nga karong adlawa sila manganhi sa Sugbo aron motambong sa ilang tigum.

Si Auxiliary Bishop Oscar Florencio ang chairman sa Adhoc Committee nitug-an sa Banat News nga tanang Obispo, retirado man o dili ang giimbitar sa plenaryo ug sa IEC.

Ang pipila kanila speakers usab sa International Eucharistic Congress forums.

Papal Legate

Gipadala ni Pope Francis gikan sa Roma si His Eminence Charles Maung Cardinal Bo, SDB, isip Papal Legate. Siya moabot karong adlaw nga Domingo Enero 24.

Matud pa ni Jayme motambong sa liturgical reception sa cathedral alas-10 sa buntag. Si Bo maoy morepresentar kang Pope Francis ug mao usab ang mangulo sa selebrasyon sa Santos nga Misa nga himuon diha sa Plaza Independencia ug sa kataposang adlaw sa IEC nga ipahigayon sa SRP.

Ang papal legate usab maoy mobasa sa mensahe nga gipadala sa Santo Papa para sa tanang katawhan nga niapil sa maong kalihukan.

Atol sa katapusan nga misa, adto usab ipahibalo kung asa na usab himuon ang sunod nga IEC.

Dalan di paagian

Sa laing bahin, ang hepe sa Cebu City Transportation Office , Rey Gealon, niaprobar sa hangyo sa Cebu Metropolitan Cathedral pinaagi ni Msgr. Renato Beltran Jr. nga ilang gamiton ang mga dalan P. Gomez, Mabini Extension ug Legaspi Street aron mahimong parking area sa mga sakyanan nga gisakyan sa mga obispo nga motambong sa opening mass sa CBCP Plenary Assembly.

Giawhag hinoon ni Gealon, ang kadagkuan sa Cebu Metropolitan Cathedral nga likayan ang double parking aron makalusot gihapon ang mga sakyanan kun adunay emerhensiya.

Gihangyo ni Gealon ang mga motorista nga likayan lang una ang pag-agi sa maong mga dalan   aron dili sila makadugang sa traffic sa lugar.

IEC Pilgrim Walk

Sa Dakbayan sa Mandaue, ang Traffic Enforcement Agency of Mandaue (TEAM) pinaagi ni Glenn Antigua, mipahibalo nga mopatuman sila og road closures sa pipila ka dalan atol sa IEC Pilgrim Walk nga mahitabo karong Enero 28 gikan sa alas 2 sa hapon hangtud na sa alas 6 sa gabii.

Bisan pa man og sa alas- 4 sa hapon pa kini magsugod  sirad-an na sugod sa alas- 2 sa hapon ang mga dalan aron malimpyuhan ang karsada nga maoy agian sa mga batan-ong apil sa Pilgrim Walk.

Manukad sila gikan sa Hoopsdome sa Dakbayan sa Lapu-Lapu ug paingon sa Mandani Bay sa North Reclamation Area sa Mandaue City  diha agi sa Mandaue-Mactan Bridge.

Ang tanang mga sakyanan nga mopaingon sa Lapu-Lapu adto paagion sa Marcelo Fernan Bridge.

Nasabutan nila ni Frank Brazil, pangulo sa City Traffic Management System(CTMS) sa Dakbayan sa Lapu-Lapu, kadtong mobalik sa Mandaue, mahimong sa karaang taytayan moagi.

Pabiling abli ang right lane sa dalan Plaridel alang sa mga sakyanan gikan sa norte paingon na sa Cebu City.

Laing kalihokan mao ang parish encounters sa mga batan-on nga mosalmot sa maong kalihokan nga pagahimoon sa Enero 27 sa mga dapit nga naglakip sa San Roque Parish sa Brgy. Subangdaku, National Shrine of Saint Joseph sa Brgy. Centro ug Holy Family sa Brgy. Maguikay sa mao gihapong dakbayan. (BANAT NEWS)