CEBU, Philippines – Nasakiyo sa mga mangingilad ang P57 mil nga cash ug P200 mil nga kantidad sa mga alahas gikan sa usa ka 85 anyos nga lola human nabiktima sa Budol-budol gang diha sa Brgy. Cansaga, Lungsod sa Consolacion sa nakalabay nga hapon.
Ang biktima mao si Felomina Ceniza, taga Brgy. Tingub sa Dakbayan sa Mandaue.
Matud pa ni Senior Inspector Wilson Abot, hepe sa Consolacion Police nga nahinabi sa Banat News naabot sa Consolacion ang biktima kuyog ang iyang helper kay namalit og ukay-ukay. Usa ka babaye nga desente og porma ang miduol sa biktima ug nagpailang kaila sa iyang anak, human niini laing babaye ang miduol ug nagpatabang kay mopalit kini og colored roofing apan mahadlok mopagawas sa iyang kwarta kay basin kuno og mabiktima sa snatcher.
Mihangyo ang babaye nga kung mahimo sa ilang balay kini magbayranay kay nagpaila man usab kini nga taga Mindoro ug gihaylo ang biktima nga pakuyogon kay interesado ang laing usa ka babaye nga giingong checker sa tindahan nga paliton iyang mga alahas.
Pinaagi sa pagmaniobra, natintal gyud ang biktima pagtunol sa iyang mga alahas nga dul-an P200 mil ang kantidad ug gipasulod kini sa usa ka bulsita ug gipahipos diha sa bag niini.
Apan diay to, gibaylo na ang bag ug ang sud sa bulsita gamay na lang nga notebook ug wa na iyang alahas ug cash.
Si Abot miingong ikaduha na kining insidente sa siyang lungsod sugod niadtong Nobiyembre nga diin maayo kaayong modiskarte ang mga suspek aron maagni ang ilang biktimahon.
Ang mga mangingilad gikatahong nagpangidaron og , 20, 30 hangtod 40 anyos, mga desente og barog. – /EIM) (BANAT NEWS)