‘Rambol’ atol sa Sinulog

CEBU, Philippines – Gireklamo sa pagpangulata  ang konsehal sa Dakbayan sa Talisay ug mga kaubanan niini atol sa Sinulog niadtong Domingo sa gabii diha sa usa ka pizza shop sa dalan Juana Osmeña Avenue, Barangay Capitol Site, sa Dakbayan sa Sugbu.

Si Senior Inspector Randy Caballes, hepe sa Police Station 2 nagkanayon nga usa ka Ralph Gemini Gabuya Abadilla, 34,  taga 92-A Gabuya St., Brgy. Poblacion-Pardo, Cebu City ang nidangop sa ilang buhatan ug nipasangil nila ni Danton Raul Go Adarna; Konsehal Eduardo Gullas III ug laing usa ka lalaki nga wa ilhi nga nangulata kaniya.

Asoy pa ni Caballes nga base sa pamahayag ni Abadilla nga nigamit siya sa pansayan niadtong tungora ug sa iyang paggawas gisugat siya og sumbag sa  grupo sa konsehal nga way igong rason.

Matud pa nahunong lang ang pagpangulata dihang adunay tawong kaila ni Abadilla nga niuwang.

Nikatap ang maong report human si Talisay City administrator John Yre de los Reyes ang ni post diha sa Facebook sa litrato ni Abadilla nga adunay bun-og ug ang hulagway sa police blotter. Si Abadilla sa pakighinabi sa Banat News nagkanayon nga hangtud ning pagbalita anaa pa siya sa Chong Hua Hospital aron magpaalim sa mga bun-og nga iyang naangkon sa pagpangulata.

"Hangtud karon wala pa ko kahibaw og ngano ila kong gikulata nga wa man unta ko nagkiat adtong higayuna kay gikapoy ko kay niapil ko sa procession," nagkanayon si Abadilla.

Siya miangkon nga iyang grupo ug ang grupo ni Gullas parehong nag-inom diha sa maong dapit niadtong higayuna. Asoy pa niya nga si Gullas ang nigamit sa CR ug pagkahuman gidasmagan niini ang iyang kauban.

"Ang ako pa gani nga kauban ang nangayo og pasaylo adto bisa’g mao ang gidasmagan," tug-an pa ni Abadilla.

Apan niadtong nakalabay nga adlaw petsa 19, nagpa-blotter usab sa Fuente Police Station ang konsehal ug Danton Adarna kauban ang usa ka babaye ug mipasangil nga sila maoy unang giatake sa grupo ni Abadilla ug naapil og kabun-og ang ilang kaubang babaye.

Nihimakak

Sa press release sa batan-ong Gullas , kini miingon nga kuyog siya sa iyang mga higalasa tindahan ni Kim Araneta aron kuhaon si Danton Ardana.

Pag-abot nila sa lugar nabantayan niya ang grupo sa mga batan-ong mga lalaki duol sa hagdan ug laing grupo ang diha sa atbang sa may comfort room.

Si Digul miingon nga dihang mipaingon siya sa CR kalit siyang gibanggaan sa usa ka lalaki ug gitutokan siya niini sa pagtan-aw hinungdan nga nangutana siya kung unsay rason nganong gibanggaan siya niini.

Si Digul mipasangil nga niadtong higayona si Abadilla kinsa diha duol sa CR uban sa laing mga grupo kalit nga miduol ug gisukmag siya diha sa likod apan nakalikay siya sa maong sukmag.

Si Abadilla giingong miusab pagsukmag ug ang kumo niini didto na mitugpa sa ulo sa kauban ni Gullas ug ang naulahi nabanda ngadto sa bungbong ug nakaangkon kini og bun-og sa ulo ug bukton.

Matud ni Digul nga dali siyang gibunlot sa uban nilang mga kauban ug gipasulod diha sulod sa tindahan ni Kim.

Matud niya nga nahitabo ang karambola apan diha na sila sa sulod sa tindahan ni Kim.

Si Digul mipasangil nga nagbitbit og kutsilyo si Abadilla ug misuway og pugos og abli sa pultahan sa tindahan ug ang maong hitabo nakuha kini sa footage sa CCTV diha sa lugar.

Si Digul nangangkon nga wala gyud siya nakasukmag ni Abadilla niadtong higayona apan usa sa mga kauban niyang babaye diriyot nakuyapan human gisukmag atol sa komosyon.

Ang kauban ni Gullas mibahad nga moduso og reklamo ngadto sa Barangay Pardo batok kang Abadilla tungod sa gihimo niini ngadto kaniya.

Nasagmuyo si Digul tungod kay gisakyan og pamolitika ang nahitabo aron dauton iyang pagkatawo.

Matud ni Digul nga sunod-sunod ang pagpangatake batok kaniya diha sa social media ug sa broadcast ug nakaapektar kini sa iyang reputasyon lakip na sa iyang pamilya.

Si Digul miingon nga pulos tumo-tumo ang gisaysay ni Abadilla diha sa blotter report sa kapolisan.

Si Gullas ang second termer nga konsehal sa Talisay nga apo ni kanhi kongresista Eduardo Gullas ug igsuon siya sa kasamtangang kongresista sa unang distrito nga si Gerald Anthony "Samsam" Gullas.

Si Konsehal Richard Francis "Choy" Aznar nga kaalyado ni Gullas nga mao sab ang majority floor leader sa konseho nagkanayon nga klaro nga pamolitika ang gibuhat ni John Yre sa pag-post sa mga litrato tungod kay political season man karon.

Apan nagdumili lang una siya sa pagbuhi og pamahayag kalabot sa maong hitabo kay wa pa siya masayod sa kinatibuk-ang insidente.

Samtang si Cong. Samsam pinaagi sa text message niasoy nga bisan og kausa wala  pa siya makakita nanukmag og isi’g ka tawo ang iyang igsuon. – /EIM) (BANAT NEWS)