Gwardiya gipusil sa janitor
CEBU, Philippines – Gipatay sa usa ka janitor ang guwardiya sa gitrabahoan niining machine shop didto sa Barangay Canduman, Mandaue tungod kay gidid-an siya sa pagsulod.
Si PO3 Nestor Montecillo sa Presinto 3 sa Mandaue City Police Office (MCPO) miila sa gipatay nga mao si Joseph Delantar, 25-anyos, minyo nga nagpuyo sa Zone Riverside sa Barangay Canduman.
Ang suspetsado nga si Junnel Dejeto, 26-anyos taga Sitio Casambagan, Barangay San Vicente, nga nakasibat unta human sa maong hitabo apan nadakpan kini sa maong dapit sa follow up operation sa kapolisan.
Matud pa ni PO3 Montecillo sa imbestigasyon nga ilang gihimo maoy ilang nasuta nga nagkabikil nang daan ang biktima sa maong suspetsado tungod sa estrikto nga pagpatuman sa mga policy nga gilatid sa nahisgotang establisamento.
Dugang pa ni PO3 Montecillo nga nahidangat unta sayo sa buntag ang maong suspetsado ug mihangyo sa biktima nga mosulod kay buot niini nga adto matulog sa sulod sa maong establisamento nga iyang gitrabahoan,
Nagdumili sa pagpasulod ang biktima sa maong suspetsado nga gikasuko usab niini hangtod nga miibot kini sa gidala niyang armas dayong pusil sa dughan sa biktima ug misibat pahilayo.
Dali nga gidala ang biktima ngadto sa Cortes General Hospital sa Barangay Ibabao sa maong dakbayan ug human sa paghatag pasiuna nga pagtambal dali kining gibalhin ngadto sa Vicente Sotto Memorial Medical Center sa Dakbayan sa Sugbo.
Ang suspetsado nagtingkagol na karon sa selda sa bilanggoan ug tukmang kaso ang ilang giandam batok niini. – /RUB) (BANAT NEWS)
- Latest