CEBU, Philippines - Gituohan nga maatiman na gyud ang mga ni-clogged up nga drainage system sa dakbayan sa Sugbo kay ang City Hall nakaangkon na og bag-ong vacuum sewer.
Ang bag-ong vacuum sewer nagkantidad og P20 milyones ug gitugyan na kini ngadto sa General Services Office (GSO) aron kasugdan na sa paggamit.
Si Konsehal Eugenio Gabuya Jr. maoy nangunay sa pagpaninguha aron ang dakbayan sa Sugbo makaangkon og dugang kahimanan sa paglimpyo sa ni-clogged up nga drainage system.
Matud ni Gabuya nga daghan kaayong mga drainage system dinhi sa dakbayan sa Sugbo ang nabara tungod sa mga sagbot ug pinaagi niining mao nga kahimanan mahimo nga masulbad na ang problema.
Kadtong mga kanal nga nabara na sa mga sagbot, pasuyopan niining vacuum sewer aron makasubay na pagbalik ang tubig, ilabi na kun mag-uwan.
Ang supplier sa mao nga kahimanan mao ang D’ Limitless Vehicles Corporation nga maoy nakadaog sa subasta. (BANAT NEWS)